Badi-səba, mənim dərdi-dilimi
Badi-səba, mənim dərdi-dilimi
Ol büti-zibayə dedin, nə dedi?
Ahü naləm asimana yetdiyin
Gərdəni minayə dedin, nə dedi?
Düşüb ayağına sən o zalımın,
Söylədinmi necəliyin halımın?
Onun həsrətindən rəngi-alımın
Döndüyün heyvayə dedin, nə dedi?
Görsə idin varmı məni-bimarə
Nüsxeyi-hüsnündə onun bir çarə;
Dildə iztirabə, təndə buxarə.
Sərimdə sevdayə dedin, nə dedi?
Ğəm əlindən payi-bəstə olduğum,
Halpərişan, dilşikəstə olduğum,
Bəstəri-möhnətdə xəstə olduğum,
Gözləri şəhlayə dedin, nə dedi?
Sərasər fələyin şəmsü mahına,
Tamam yer üzünün qibləkahına,
Zakirin əhvalın xublar şahına
Ağlaya-ağlaya dedin, nə dedi?