Heyf, bilmədim kim, bu bülbülü

Şahi-gülrüxan istər, istəməz?

Bu cəfakeşi, xəstə aşiqi

Yari-cansitan istər, istəməz?

Ey səba, bu dəm can fəda sənə,

Ərzi-halımı yarə sən sölə.

Bu səməndəri, bu qələndəri

O şəkərdəhan istər, istəməz?

Tez gətir xəbər, qoyma intizar,

Etmə çox məni zarü biqərar.

Kim, desin görüm, odda yanmağa

Böylə Xançoban istər, istəməz?

Yoxdu qasidim, göndərim pəyam,

Yarə dərdimi eylədim əyan.

Doğrusun desin, etməsin nəhan,

Böylə xan çoban istər, istəməz?

Dikmişəm yola çeşmi-əşkbar,

Kuhi-Turə gəl, eylə bir güzar,

Bir yetiş, məni ol vəfaşüar

Böylə bizəban istər, istəməz?

Üzdü canımı möhnəti-fəraq,

Yaxdı cismimi nari-iştiyaq,

Icz qıl, sölə ahü zar ilə

Böylə canfəşan istər, istəməz?

Söylə rahətim yoxdu bir zaman,

Sübhü şam işim ahdır, aman.

Tut xəbər, belə könlü pürfəğan,

Çeşmi-xunfəşan istər, istəməz?

Payimal edib adü sanımı,

Eylədim xərab xanimanımı.

Bilmirəm dəxi bundan artıcaq

Halımı yaman istər, istəməz?

Çün bu ərsədə çoxlar atını,

Quyruğun düyüb, oynadıb, çapıb.

Bu Nəbati də əsbi-laşəsin

Çapdı bir inan, istər, istəməz?