Kilki-qüdrət ilə katibi-ğəza
Kilki-qüdrət ilə katibi-ğəza,
Maşallah, əcəb közü qaş çəkib!
Xəttü xalə verib xeyli nəzakət,
Siyəh zülfü hamısından baş çəkib.
Gərdənin, qamətin qiyaməti var,
Hərami ğəmzənin yüz afəti var,
Həqdi, tər buxağın lətafəti var,
Amma rüxi-alı çox qumaş çakib.
Tərhi bir özgədir incə miyanın,
O mərmər sinənin, bəyaz püstanın,
Ədən dəryasında dürci-dəhanın
İçində dürləri xoş təraş çəkib.
Məşuqun işidir cənk ilə cədəl,
Bilir rəsmü rahı, eyləməz əməl,
Çəkəndə aşiqi nəqqaşi-əzəl,
Dilində ah, gözlərində yaş çəkib.
Ol zalimü bədxu, şuxü sitəmkar
Zakirin halından deyil xəbərdar.
Eşq əhlini edən dərdə giriftar,
Heyf ki, xubları bağrı daş çəkib.