BAX!
Ay könül, aç didəni, hər yanə bax! Əsrə bax, ovqatə bax, dövranə bax! Bir dayan, Təbrizə bax, Tehranə bax! Əlqərəz, İranə bax, viranə bax!
Rəştə bax, Qəzvinə bax, Kaşanı gör, Məşhədə, Şirazə bax, Kirmanı gör, Ənzəli, Behşəhrə bax, Zənganı gör, İsfahanə qıl nəzər, Gilanə bax! Əlqərəz, İranə bax, viranə bax!
Baxgilən məşrutəyə, hürriyyətə, Alimə, alimliyə, ünsiyyətə, Hiyləyə, təzvirə, iblisiyyətə, Sonra da bir firqeyi-şeytanə bax! Əlqərəz, İranə bax, viranə bax!
Gör nə meydangir olubdur köhnələr, Hər biri bir əjdəha, bir nərrə xər, O nə əmr eylər, bu nə ifa edər, Hakimi-Gilanə bax, Tehranə bax! Əlqərəz, İranə bax, viranə bax!
Gah olur iranlılar məşrutəçi, Etidaliyyun, gəhi məşruəçi, Əsl istibdadçı, məxrubəçi. Müctəhid, mollanı gör, əyanə bax! Əlqərəz, İranə bax, viranə bax!
Gəh mücahiddir görürsən qəhrəman, Gahi bir cəlladi-zalim, şarlatan, Gah elə, gahi belə, gahi filan, Məsləkə, imanə bax, vicdanə bax! Əlqərəz, İranə bax, viranə bax!
Təsliyətbəxşa deyil yarın işi, Daxilü xaricdə əğyarın işi, Düz deyil hətta Sipəhdarın işi, Məmləkətdə kanə bax, kənkanə bax! Rusə bax, İngiltərə, Almanə bax!
İrticaə zidd imiş “İrani-no”, “Şərq” tənqid eyləyirmiş nobəno, Xainin tənqid eyləyirmiş mubəmu, Bağlanır yeksər qəzet, çapxanə, bax! Əlqərəz, İranə bax, viranə bax!
Bu necə məşrutədir, nə əncümən? Həp rəisi molla, əzası gühən, Bülbüli-şeydaləri zağü zəğən, Bənzəyir bir şəhri-hiçistanə, bax! Ey könül, bu mülkə bax, divanə bax! Daima dərdindən ol divanə, bax! Əlqərəz, İranə bax, viranə bax!
Məşədi Sijimqulu “Molla Nəsrəddin”, 1910, N 22.
|