Çubi-“Mollaya”, nişi-“Zənbur”ə

Aqila, bir dəva tapılmazmı?

Bu bəlayi-əzimi-məşhurə,

Alima, bir dua tapılmazmı?

Əsri-axırda “Molla-Nəsrəddin”,

Etdi iğva cəmaəti, bidin.

İşbu “Zənbur” bihəya və ləin,

İndi də qoydu payi-mənşurə

Vay, bir rəhnüma tapılmazmı?

Yoxmu, zi iqtidar bir cindar,

Tas elmində alimü huşyar.

Eyləsin cini qövmünü ehzar,

Eyləsinlər əlac rəncurə,

Bircə alimnüma tapılmazmı?

Aldı ətrafi-ümməti qəmlər,

Getdi əldən şərvəti-əthər,

Hardadır Giv, Tus, Rüstəmlər

Payimal oldu mollalar murə,

Ah, bir canfəda tapılmazmı?

Ah, əfsus, olduq avarə,

Abru getdi, yandıq odlarə.

Yoxmu bu mübtəlayi bir çarə?

Oldu viranə qəlbi-məmurə...

Bu qəmə intəha tapılmazmı?

Bircə möcüznüma tapılmazmı?

Rəbbəna, rəbbəna! Tapılmazmı?

Şəmşirək

“Zənbur”, 1909, N 36.