Pozdu işi bu qəzet yazanlar!

Çoxdandı ki, qaynamır qazanlar!

İşlər dolaşıb, dönüb zəmanə,

Yel əsdi, dağıldı aşiyanə!

Gəlmir, kəsilibdir abü danə.

Çoxdandı ki, qaynamır qazanlar!

Pozdu işi bu qazet yazanlar!

Çıxdı əli paxlalı plovdan,

Dolma, küküdən, kabab, çilovdan.

Minbərdə deyirdi Molla Qurban.

Çoxdandı ki, qaynamır qazanlar!

Pozdu işi bu qazet yazanlar!

Gəldi rəcəb ayı, mahi-ehsan,

Ardınca gəlir bunun da şəban.

Keçmişdəkilər hanı, de, əlan?

Möminləri azdırıb, azanlar!

Pozdu işi bu qazet yazanlar!

Keçmişdə bu ayları müsəlman,

Hazırlar idi pilov, fisincan:

Moizə elərdi Molla Qurban:

İndi dəxi qaynamır qazanlar!

Pozdu işi bu qazet yazanlar!

Bu qurbağaları, ilan-çayanlar,

Hər bir əməli lağa qoyanlar.

Ax, bu qazetə-zadə uyanlar!

Mollalığa lap quyu qazanlar!

Pozdu işi məsxərə yazanlar!

Hardan ki, ona olurdu hasil!

Beş şahi: ora çəkildi hail,

Yoxdur, kəsilib rəhi-mədaxil,

İndi dəxi qaynamır qazanlar!

Pozdu işi bu qazet yazanlar!

Şəmşirək

“Zənbur”, 1909, â„– 16.