BÜKÜLMÜŞ
Bu yer gözəlinə nabələd olmuş, Bir söz dedim, quru dilə bükülmüş. Xətayını görcək, xəta eylədim, Ləli-göhər bir məndilə bükülmüş.
Qurban olum alagözün məstinə, Bal tökülüb al dodağın şəstinə, Əlim qoyum tər sinənin üstünə, Darçına, mixəyə, hilə bükülmüş.
Gecə ikən mehman olduq bunlara, Geyinib, batıbdı yaşıl-allara, Qızıl bəzmənd, lülə şümşad qollara, Gümüş kəmər incə belə bükülmüş.
Qurban olum obana, həm soyuna, Mina gərdəninə, uca boyuna, Divanə Valehi alsa qoynuna, Sanasan ki, bülbül gülə bükülmüş.
|
© 2011 Ədəbiyyat portalı - www.azerlit.info