Qonaq Kitabı
KƏC QABIRĞA

 

(Dabanı çatdax xalaya)

 

Niyə, bilməm, yenə bu karə bulaşdın, a xala!

Atılıb ortaya bir mərəkə aşdın, a xala?

Qaynayıb sönmüş idin, bir daha daşdın a xala?

Nə həya qaldı, nə ismət, yavalaşdın, a xala!

Əsl şəhrah təriqindən uzaşdın, a xala!

 

Demədimmi sənə çadrşəbi atma dalına?

Vermə təğyir nə başmağına, nə paltarına,

Ağarıb bomboz olub, bircə həna qoy yalına,

Sözlərim etmədi bir zərrə təfavüt halına,

Get-gedə erməniyə, rusə yanaşdın, a xala!

Əsl şəhrah təriqindən uzaşdın, a xala!

 

Gəh sataşdın Sənəmə, gah Tükəzban bacıya,

Gah bəyə, xanə, gəhi şeyxə və gahi hacıya.

Gəhi seyyidlərə, mollalara, molla Ağıya...

Molla Mədumə və Məyubə və Bağır Hacıya,

Abidə, zahidə, əyanə dolaşdın, a xala!

Əsl şəhrah təriqindən uzaşdın, a xala!

 

Mən ölüm! Sən də müsəlmanmı deyirsən özünə,

Çadran yox, nə də rubəndə salırsan üzünə.

Ağrım olsun o həyasız üzünə, pis sözünə

Yaxşı çəkdin qabağa milləti, küllər gözünə,

Gündə bir mömünə övrətlə dolaşdın, a xala!

Əsl şəhrah təriqindən uzaşdın, a xala!

 

Qırışıb annın, a batmış, bükülübdür kəmərin,

Çöküb ordun, əyilibdir çənən, olsun xəbərin,

Sallanır bir ayağın qəbrə, var axır səfərin,

Eyləmə öylə ki, söysün sənə qırx altı ərin,

Eylədin onları təhqir, savaşdın, a xala!

Əsl şəhrah təriqindən uzaşdın, a xala!

 

Demə hürriyyəti-nisvanı, məhal işdi, məhal,

Açma bu məsələni, yoxdu lüzum, etmə səval,

Abrın olsun, a məlunəyi-biəqlü kəmal,

Söyləmə, söyləmə, kəs, kəs səsini, lal ol, lal,

Dinmə, yum ağzını kim, dinə sataşdın, a xala!

Əsl şəhrah təriqindən uzaşdın, a xala!

 

Gər qalırsa mana: nisvan daşını atmalıdır,

Kəc qabırğalıları həbsə, dama qatmalıdır,

Kəc qabırğanı vurub, sındırıb axsatmalıdır,

Kəc qabırğayə tərəfdar olanı atmalıdır...

Yoxsa İranə baxıb səndəmi çaşdın, a xala!

Əsl şəhrah təriqindən uzaşdın, a xala?!!

 

 

Dostunuz Məşədi Sijimqulu

“Molla Nəsrəddin”, 1909, N 49.

 

 

 

 



 
[1] 
 
© 2011 Ədəbiyyat portalı - www.azerlit.info