ALDANMAYIN
Ay yazıq iranlılar, aldanmayın! Hər sözə, hər vədəyə tovlanmayın!
Tez elə tovlanmayınız hər sözə, Bir tələdir bəlkə qurullar sizə Çıxmasa asari-sədaqət üzə, Hər sözə, hər vədəyə tovlanmayın! Atəşi-zülmə yıxılıb yanmayın!
Dam üzərində görərək danəni, Verməyin əldən dili-divanəni, Yadə salıb məclisi-viranəni Aqibətəndiş olun, aldanmayın! Ay yazıq iranlılar, odlanmayın!
Görmədinizmi hələ Tehranı da, Məclisi-millidə axan qanı da, Parçalanan ayeyi-quranı da, Bir daha icmaə qığıldanmayın! Ay yazıq iranlılar, aldanmayın!
Ey vətən övladı, nədir bu şitab? Bu nə kəşakəşdi, bu nə inqilab? Ax, nə parilman, nə hesabü kitab? Ədl, ədalət deyə odlanmayın! Ay yazıq iranlılar, aldanmayın!
Ey vükəla! Sizdə nədir bu həvəs, Ölməyə amadəsiniz hər nəfəs. Qorxuram axır sizə olsun qəfəs: Gülşəni-Tehranə qanatlanmayın! Dərdü qəmi-millətə qatlanmayın! Ay yazıq iranlılar, atlanmayın!
Kefsiz “Molla Nəsrəddin”, 1909, N 19.
|