VERMƏYİN BİR BELƏ QULLUQ
Verməyin bir belə qulluq mənə heç əl, Vahid! Bu edir şairi avarə, məəttəl, vahid! Dirilik sürməyi, zövqü daha çox anlar ikən, Sübhümüz oldu nədən şamə mübəddəl, Vahid!
12 aprel 1930, Azərnəşr
CAVAB
Ustadım Nəzmiyə
Mən fəqət sadə ilə badəpərəstəm, Nəzmi! Bir xərabatiyəm, hər ləhzədə məstəm, Nəzmi! Bir fəqirəm, nəmə lazım təhəmi-dövləti-Cəm Qəsri-Daranı sevərsəmsə də, pəstəm, Nəzmi!
27 iyun 1930, Azərnəşr
Nə köpəkdir qata qəm nəşənə əngəl, Vahid! Versə saqi bir əyağ ilə sənə əl, Vahid! Məstlik, ərəqdə deyil isə mətlub, fəqət, Cam edər məsələni həlli-müəffəl, Vahid.
29 iyun 1930
Mən nə divanə, nə əyyaş, nə pəstəm, Vahid! Nə rəyasət, nə də kaşanəpərəstəm, Vahid! Təkcə bir qönçə dodaqdan süzülən qətrə ilə Boylə sərgərmü sərəfgəndəvü məstəm, Vahid!
|