MƏZMUN-MƏZMUN
(Bəzi ziyalılarımız kitabxanadan istifadə üçün götürdükləri kitabları mənimsəyib, bir daha kitabxanalara qaytarmırlar...)
Dün yolum düşdü kitabxanəyə məcnun-məcnun, Gördüm ol dairəyi həp dolu məzmun-məzmun.
Düşmüş idi oraya bir də keçən il güzərim, Bir sevinc ilə açılmışdı həvalərdə pərim. Uçmaq istərdim o gün, qalmamış idi kədərim, Məndə bir nəşə yaratmışdı o günkü səfərim. Dönmüş idim o məkandan evə məmnun-məmnun.
Çünki görmüşdüm onu başdan-ayağə rəngin, Dopdolu dürlü kitablar, münəzzəm, zəngin. Bəxş qılmışdı onu xəlqimizə dövri-nəvin Dün fəqət gördüm itirmiş o lətafət, o fərin, Əzdi küsgün nəzəri ilə məni məğbun-məğbun.
Sordum ondan ki, nə olmuş sənə, ey dari-ədəb. Oldu kim gül yüzünün solmağına boylə səbəb? Səndən almaqda idi nur, ziyalılar həp. Bir acı güldü, həman açdı bəyan etməyə ləb Şərhi-hal eylədi bu növ ilə məhzun-məhzun!
Mən, dedi: köksümü açdım bu qraxmallılara, Qıymadım qalmaların elm yolunda avara. “Həpsi övladi-vətəndir” dedim, etməz ki, para, Vurdu bəziləri bu sinəmə yüzlərlə yara, Çaldılar xeyli kitablarımı məlun-məlun.
Bilmədim, bunda suçum varmı, fənasın, eyisin, Səhv olub, anlamadım, əqillisin, “hey-heyi” sin! Var qulağı-başı, insan ona baxsın, nə desin, Heç görünmüşmü, kitab-kağızı insan da yesin? Sarmaşırlardı dolablarıma məftun-məftun, Oldu rəngim o ağ əllərləcə mədfun-mədfun?
Söyləyirmiş biri bir yerdə fəxarətlə dünən Ki, aşırmış bir-iki ildə kitab, əlliyəcən. Var, inanmazdım, iki, ya üç ayaqlı kəsəyən. Qafiləmmiş, bu gün öyrətdi mənə elmü fənn. İndi mən nəzmə çəkim, sən oxu məznun-məznun. Dün yolum düşdü kitabxanəyə məcnun-məcnun.
Kefsiz “Molla Nəsrəddin”, 1927, â„– 13.
|