Bir könül kim, ola daim rüxi-canan ilə cəm
Bir könül kim, ola daim rüxi-canan ilə cəm, Olmaz ol bir də dəxi tərfi-gülüstan ilə cəm.
Məni meydən, sizi tari ki, əgər mən’ edəsiz, Ki, mənim könlüm olur Cəm kimi bu qan ilə cəm.
Dağıt, əfşan elə ol türreyi-ənbərşikəni, Ta ki, olsun könül o zülfi-pərişan ilə cəm.
Bir könül kim, ola bir qönçə-ləbin məftunu, Olumu bir də məgər badeyi-reyhan ilə cəm?
Künci-vəhdətdə könül şəm’inə oldum qane, Şəm’i-dil olmaz imiş şəm’i-şəbistan ilə cəm.
Bülbüli-tabi-xəzan-didə kimi gülşəndə, Könlümü eyləmişəm təb’i-qəzəlxan ilə cəm.
Kilki-neydən tökərəm kağəzə şəhdi-şəkəri, Dürri-nəzmi edərəm gövhəri-qəltan ilə cəm.
Dağılan xəstə könül şişəsinin parələrin Rizə-rizə elərəm səbheyi-sübhan ilə cəm.
Yusifi-Misr kimi tə’neyi-ixvani-həsud, Etdilər xatirimi möhnəti-zindan ilə cəm.
Səbrnən həll olu hər üqdeyi-müşkül, billah, Ləzzəti-vəsl olur zəhməti-hicran ilə cəm.
Yarı tut, qeyri unut sən də, gözum, Məcnun tək, Mümkün olmaz ola bir can iki canan ilə cəm.
Tuşeyi-rahi-fəna etməyə hər xarü xəsin, Edərəm badiyeyi-eşqdə müjkan ilə cəm.
Hardasan, harda qalıbsan genə, ey şuri-cünun, Ah, oldum, genə bu əqli-giran can ilə cəm.
Çarə qıl dərdimə, saqi, mənə bir cam, aman! Olsa, könlüm olacaq dideyi-giryan ilə cəm.
Mərhəba, dilbəri-tənnaz nə xub etdi, görün, Köksümün yarəsini navəki-peykan ilə cəm.
Ey könül, eylə dəxi zöhdü riyadən pəhriz, Gəl, Nəbati kimi ol, həlqeyi-rindan ilə cəm.
|