QUZU
Bir obada körpə quzu Mələr-mələr, qaçar düzü, Anasını arar gözü. Dedim: - Qaçma, gözəl quzum, Səni mən bəslərəm özüm.
Gün əyildi, çökdü duman, Sürü qayıtdı otlaqdan; Səs-küy ilə doldu hər yan. Dedim: - Qaçma, gözəl quzum, Səni mən bəslərəm özüm.
Qoyunları çoban yığar, Fatı xala gəlib sağar, Quzum mələr, durub baxar. Dedim: - Qaçma, gözəl quzum, Səni mən bəslərəm özüm.
Anasını quzum görər, Ayaqların yerə dirər. Məməsin tapıb əmər. Dedim: - Qaçma, gözəl quzum, Səni mən bəslərəm özüm.
Quzum çıxdı göy otlağa, Yanaşdı bir boz oğlağa, Çıxdı onunla oynağa. Dedim: - Qaçma, gözəl quzum, Səni mən bəslərəm özüm. 1906
|
© 2011 Ədəbiyyat portalı - www.azerlit.info