Dilbəra, yüzünü görsəm mahi-tabanım derəm,

Boyunu görgəc budur sərvi-xuramanım derəm.

Kirpigin, qaşın görüb tirü kamanım söylərəm,

Zülf ilən vəchin görüb şəmi-şəbistanım derəm.

Zəhməti-dərdin könüldə eyni-dərmandır mana,

Can demən mehrinə təndə, bəlkə cananım derəm.

Bülbüli-baği-vüsaləm, ey güləndamım mənim,

Arizü rüxsarını görsəm, gülüstanım derəm.

Eşqiniz könlündə çün dutmuş Xətayinin məqam,

Mən anı viran içində gənci-pünhanım derəm.