Firqətin çəkdim, nigara, şimdi yar olmazmısan?

İxtiyarım getdi əldən, ixtiyar olmazmısan?

İntizarım həddən ötdü, hicr ilən oldum həlak,

Ğəmlü könlüm halinə bir ğəmgüsar olmazmısan?

Düşmədim sevda əlindən, bülbüli-can oldu lal,

Vəqtdir gül çöhrən açıb novbahar olmazmısan?

Munca möhnət çəkdin, ey dil, zülməti-hicran şəbi,

Ol məhin vəslinə yetdin, bəxtiyar olmazmısan?

Gər günahın çoxdur, ey miskin Xətayi, ğəm yemə,

Rəhmətinə xaliqin ümmidvar olmazmısan?