Mana cövrü cəfa qılmaq degil, cananələrdəndir,

Yaman yoldaşilən yar olma ki, nadanələrdəndir.

Mənim tək aşinayi yad qıldın, ey tərəhhümsiz,

Fələkdən görməzəm anı, qamu biganələrdəndir.

Fədadır bil yəqin billah, yolunda cani-şirinim,

Cəmalın şəminə hər dəm yanan pərvanələrdəndir.

Xəbər dutmaz həqiqətdən riyayi zahidin fəhmi,

Anın fikri əcayib qissəvü əfsanələrdəndir.

Xətayi, nəzmi-əşarinə yüz min afərin gəlsin

Ki, aqillər xəyalından degil, divanələrdəndir.