Nə buyursan, şəha, fərman sənindir.

Yolunda canü baş qurban sənindir.

Xəta məndən, əta səndən, əya dust,

Ki, mürvət kanısan, ehsan sənindir.

Susamış ləblərin Xızri-zəmanə,

Suvar, gəl çeşmeyi-heyvan sənindir.

Səvar ol dövlət atını həmişə,

Səadət topuna çövkan sənindir.

Mələklər müştəridir gül yüzünə,

Sür imdi, ey qəmər, dövran sənindir.

Əzəldən canımı qurban verərdim,

Qəbul eylə, şəha, fərman sənindir.

Eşigində qulundur bu Xətayi,

Nəzər qıl halına, heyran sənindir.