Qonaq Kitabı
Dilbəra, dərdimə dərman səndən özgə kimsə yox

 

Dilbəra, dərdimə dərman səndən özgə kimsə yox,

Həm dəxi könlümdə iman səndən özgə kimsə yox.

 

Hicr evində mən kiminlə həmdəm olum, ey sənəm,

Könlümün şəhrində mehman səndən özgə kimsə yox.

 

Xızr tək zülmətdə qaldım, bir mədəd qıl tanrıçün,

Təşnə üçün abi-heyvan səndən özgə kimsə yox.

 

Hər nə kim, hökm eyləsən, eylə mənə, ey eşqi-yar,

Könlümün təxtində sultan səndən özgə kimsə yox.

 

Bu Xətayi xəstənin vergil muradın, ya ilah,

Kim, mənə lütf ilə ehsan səndən özgə kimsə yox.

 



 
[1] 
 
© 2011 Ədəbiyyat portalı - www.azerlit.info