Hər kimin kim, rəhbəridir sidqü ixlasü səfa
Hər kimin kim, rəhbəridir sidqü ixlasü səfa, Oldurur darın içində bəndeyi-Fəzli-xuda.
Sadiqil-qövlül-əmini istərisən sən bu gün, Çün biləsən sadiqül-qövlül-əmini-Müstafa.
Cövrünə səbrü təhəmmül eyləgil müşriklərin, Necə kim, gördü Rəsul ilə Əliyyül-Mürtəza.
Şərbəti-maü təhuru istər isən, qəm yemə, Dövr əlindən zəhr nuş et, çün Həsən xülqi-riza.
Gər bu gün bunda susuzluqdan olursan sən şəhid, Yarın onda həşr olursan ba Hüseyni-Kərbəla.
Taətin fövt etmə, şeytan gərçi yüz nur göstərir, Qiblədən döndərmə üzün, necə kim, Zeynəl-Iba.
Şol Məhəmməd Baqiri gör şər’ bazarında kim, Necə verdi hədyəni çün lütf ilə Allah ona.
Cə’fəri-Sadiq məratibin dilərsən, sadiq ol, Sidq ilə bu yolda qul ol, bulasan mənzil ə’la.
Müddəi tə’ninə səbr et Museyi-Kazim kimi, Həq bilir kim, həqq iləvü necə oldu macəra.
Gəl Əli, Musa Riza kimi həqin əmrini tut, Necə kim həqdən gəlir canü könüldən çun riza.
Həm Təqi kimi vücudun mülkünü viran qılıb, Bu fənada fani ol kim, bulasan mütləq bəqa.
Sirri-əsmadan xəbər bilmək dilərsən çün Nəqi, Müttəqi ol, müttəqi ol, müttəqi ol, biriya.
Əsgəri kimi əgər nəfsin çərisin basasan, Bigüman sənsən yəqin kim, maliki-hər dü səra.
Şol Məhəmməd Mehdi kimi ədl edib, cəhd edəsən, Hiç gümansız məskən ola cənnətül-mə’va sana.
Ta ki, mən qıldım nəsihət uşbu xəlqə hər sözün, Kim qəbul etdi bu və’zi, buldu həqdən çox əta.
Gecə-gündüz fikrü zikrim şahidü şəm’ü şərab, Hər zəmanü hər nəfəsdir karü barım ahü va.
Şol Məhəmməd Mustafanın üz suyu çün, ya ilah, Rəhmət etgil mən fəqirü asiyə ruzi-cəza.
Həm bu on iki imamın hörməti-həqqi üçün Bu həva ilə məni yandırma fin-naril-zəla.
Ta səqahüm şərbətin içdi Nəsimi dər-əzəl, Həqqi kəşf etdi rümuzi-sirri-əsmai-xuda.
|