İxlas ilə ta canımı canana yetirdim
İxlas ilə ta canımı canana yetirdim, Düşmənləri bu həsrət ilə cana yetirdim.
İsgəndəri zülmata irişdirdimü döndüm, Xızrın sifətin çeşmeyi-heyvana yetirdim.
Həm Yusifi mən çahi-biyabana buraxdım, Həm atəşi mən Musiyi-Imrana yetirdim.
Bəhri-mühiti həm ləbi-çeşmimdən axıtdım, Həm qətrəyi mən bəhr ilə ümmana yetirdim.
Həm tutiyə mən şəhdi-şəkərdən səmər etdim, Həm bülbülü mən bağ ilə bustana yetirdim.
Həm seyrdə mən mütrib ilə həmnəfəs oldum, Həm saqiyi mən sağərü peymana yetirdim.
Özümnü Əsədullaha kəmtər qulam etdim, Həm mö’cüzü mən şahi-Xorasana yetirdim.
Həq gördüvü həq dedi, Nəsimi nə desin kim, Həm şe’rimi mən ayəti-Qur’ana yetirdim.
|
© 2011 Ədəbiyyat portalı - www.azerlit.info