MÜXƏMMƏS
Zivər nə səzadır sənə, ey dilbəri-ziba! Binəqs yaratmış səni ol xaliqi-yekta! Deş bağrını dürdanələrin, boynuna asma! Et vəsməyə sən qaşü qabaq, ey qədi mina! Yum gözünü həm sürmədən, ey gözləri şəhla!
Kirşan, sənəma, ayineyi-ruyun edər tar, Qoy həsrəti-vəchində ərisin onu zinhar. Gər qazə dəxi meyli-rüxun eyləsə izhar, Tök qanını öz dəstin ilə, ey büti-əyyar! Axır nəçidir vəslini o edə təmənna?!
Hüsnün sözü hər firqəyədir türfə fəsanə, Salmış bu zaman mehri-rüxun şölə cəhanə. Döndərdi sənin rəşki-ləbin badəni qanə, Düşsün tora, ya rəb, girə gör zülfünə şanə, Onun nə rəvadır düşə başına bu sövda?!
Əngüştərinin gözünə barmaq ola hər dəm, Gör meyl qıla kim ola dəstində mükərrəm, Əlbəttə edərsən kəmərin qamətini xəm, Bundan sora ta edə miyanın həvəsin kəm, Lütfü nəzərin kəsmə vəfadardan əmma!
Tiflis müsəxxər sənə, ey düxtəri-tərsa! Aşiqlərinə məbəd olub deyrü kəlisa! Məndən sənə vəsf istədi şıxlı Əli Ağa, Dedim: səni vəsf etməyə manəndi-Məsiha, Ruhülqüdüs imdadı gərək nitqi-Məsiha.
|