Qonaq Kitabı
YALANÇI ÇOBAN

 

Bir çoban bir gün etdi dağda haray:

“Canavar var, - dedi, - gəlin, ey vay!”

 

Əhli-qəryə yüyürdü dağ tərəfə,

Getməsin ta qoyun, quzu tələfə.

 

Bunları müztərib görüncə çoban

Gülməyə başlayıb dedi: “Yaran,

 

Siz bunu sanmayın həqiqətdir,

Damağım gəldi, bir zərafətdir!”

 

Binəvalar qayıtdı; leyk çoban

Yenə bir gün dağ üzrə qıldı fəğan:

 

“Canavar var!” – deyə bağırdı yenə,

Qəryə əhlin kömək çağırdı yenə.

 

Kəndçilər etdilər dübarə hücum,

Yenə oldu yalanlığı məlum.

 

Doğrudan bir zaman bəəzmi-şikar

Qoyuna gəldi bir neçə canavar.

 

Hərçi dad eylədi çoban, yahu!

Eşidənlər dedy: yalandır bu!

 

Bu səbəbdən hərayə getmədilər,

Ona heç etina da etmədilər.

 

Canavarlar yedi bütün qoyunu,

Iştə, oğlum, yalançılıq oyunu!

 

Bax, yalançı tanındı çünki çoban,

Doğru derkən sözü göründü yalan.

 

Hərgiz, oğlum, yalan demə ki, xuda

Dust tutmaz yalançını əbəda!

 

Həm də xəlq içrə hörmətin olmaz,

Izzətin, qədrü qiymətin olmaz.

 

“Evi yandı yalançının” – derlər, -

Ona bir kimsə etmədi bavər”.

 

 

İlk dəfə “Yeni həqiqət” qəzetində (11 fevral 1911, â„– 18) “Ə.S.” imzası ilə çap olunmuşdur.

 

 



 
[1] 
 
© 2011 Ədəbiyyat portalı - www.azerlit.info