EY DIL, AMANDI, SIRRINI BIGANƏ BILMƏSIN!
Ey dil, amandı, sirrini biganə bilməsin! Ahəstə zülfi-yardə yat, şanə bilməsin!
Düşdün xəyali-daneyi-xal iştiyaqinə, Ey mürği-rəf, tizpər ol, danə bilməsin!
Ey yar, can fədayi-qüdumi-mübarəkin, Ahəstə qıl xüram ki, həmxanə bilməsin!
Qeyrət həlak edər məni, açma cəmalini, Göstərmə şəmə ruyini, pərvanə bilməsin!
Bir ləhzə bəzmi-yardə dilşadəm, ey könül, Aram tut, bu mətləbi biganə bilməsin!
Ey ahi-sərd, urma nəfəs zülfi-yarə sən, Bir dəm qərar tut, dili-divanə bilməsin!
Zahid edərsə eşqdə təkfir Sabiri, Zahir gözilə Kəbəni bütxanə bilməsin!
İlk dəfə 1914-cü ildə “Hophopnamə”də çap olunmuşdur.
|
© 2011 Ədəbiyyat portalı - www.azerlit.info