HƏR SƏRI-MUYDƏ MIN AŞIQI-NALANIN VAR
Hər səri-muydə min aşiqi-nalanın var, Məgər, ey şux ki, bir cismdə min canın var?
Leyliyə Qeys olur aşiq, sənə min-min Leyli, Axtarırsan yenə bir aşiq, əcəb qanın var!
Xahişin tərki-dilü can idi, mən həm etdim, Söylə, ey yar, görüm şimdi nə fərmanın var?
Eyd-əzhadə qoyun kəsmə, boyun qurbanı, Aşiqi-zar kimi kəsməyə qurbanın var.
Suzi-binaleyi-pərvanəni gör, ey bülbül, Səhni-gülzardə ancaq sənin əfğanın var.
Hər mərəz çarəsini eyləmək asandı, təbib, Mərəzi-eşqə nə tədbir, nə dərmanın var?
Sabira, qərq edər axir səni bu seyli-bəla. Olma qafil belə kim, dideyi-giryanın var.
İlk dəfə “Hophopnamə”nin 1914-cü il nəşrində çap olunmuşdur.
|
© 2011 Ədəbiyyat portalı - www.azerlit.info