İLTİHABİ-TƏƏSSÜRATIMDAN YENƏ BİR ŞÖLEYİ-CƏHANSUZUM
Ələman, ey şahi-Yəsrib mədfənü Məkki vətən, Ya nəbiyyürrəhmə, ey məhbubi-rəbbi-zülminən, Şəri-pakində həram olmaqda ikən sui-zənn, Ümmətin salim deyil bu xisləti-məzmumədən, Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
Nəşeyi-sidqü səfadən əhli-dil olmaqda məst, Sağəri-ixlas olur səngi-məlamətdən şikəst, Etmədən təhqiqi-mətləb xəlq olub zahirpərəst, Cahilü nadan büləndü aqilü huşyar pəst, Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
İstiqamət birlə sərv etdikdə meyli-etidal, Tişeyi-xərratdən təxlis üçün bulmaz məcal, Bir fərağət bulmuş ikən qəlb olur cayi-məlal, Gündə min tazə bəlayə uğrayır əhli-kəmal, Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
Ey bəsa müslim ki, itham ilə təkfir eylənir, Ey bəsa ali, gümani-bədlə təhqir eylənir, Sidq – kizbə, mehr – büğzü kinə təbir eylənir, Müxtəsər sidqü sədaqət əhli təkdir eylənir, Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
Dəsti-qəlb-işkən cəsuru payi-himmət kəmqərar, Kari-batil hökmfərma, çeşmi-həqbin pürxumar, Bəxt tirə, yar sadə, çərx kəc, el hiyləkar, Əsr namərd, əhl bielm, əmr müşkil, elm xar, Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
Ya nəbiyyəl-müslimin, ey həq-təala rəhməti, Çox fənadır əmrimiz, dərk eylə hali-ümməti, Getdi izzət, batdı şövkət, tutdu zillət milləti, Ələman, sümməl`əman (ya mən ileykə hacəti), Tiri-sui-zənnə salehlər nişan olmaqdadır! Gül könüllər qönçələrtək bağrı qan olmaqdadır!
İlk dəfə “Tazə həyat” qəzetində (3 avqust 1907, â„– 89) “Əli Sabir Tahirzadə Şirvani” imzası ilə çap olunmuşdur.
|