MÜSƏLMAN VƏ ERMƏNİ VƏTƏNDAŞLARIMIZA
Əsrimiz xahiş edərkən ittifaqü ittihad, Cümləmiz əmniyyət içrə almaq istərkən murad, Beynimizdə yox ikən bir günə əsbabi-təzad, Bu vətən övladinə ariz olub büğzü inad, Müslimanla ermənilər beyninə düşdü fəsad, Yoxmu bir sahibhidayət, yoxmu bir əhli-rəşad?!
Ey süxəndanan, bu günlər bir hidayət vəqtidir! Ülfətü ünsiyyətə dair xitabət vəqtidir!
Iki yoldaş, iki qonşu bir vətəndə həmdiyar, Əsrlərcə ömr edib, sülh içrə bulmuşkən qərar, Fitneyi-iblisi-məlun oldu nagəh aşikar... Gör cəhalətdən nə şəklə düşdü vəzi-ruzigar! Qətlü qarət bişümarü şəhrü qəryə tarimar!
Ey süxəndanan, bu günlər bir hidayət vəqtidir! Ülfətü ünsiyyətə dair xitabət vəqtidir!
Fitnələr kim, faş olur, bilməm nə halətdən törər, Əql bavər eyləməz kim, adəmiyyətdən törər, Müslimiyyətdən və yaxud erməniyyətdən törər, Şübhə yoxdur, cəhldən, yainki qəflətdən törər, Bu müsibətlər bütün büğzü ədavətdən törər, Bu ədavət mütləqa hali-zəlalətdən törər; Ey süxəndanan, bu günlər bir hidayət vəqtidir! Ülfətü ünsiyyətə dair xitabət vəqtidir!
Həqqi xəlqə bildirib dəfi-zəlalət etməli, Gün kimi taban edib, pamali-zülmət etməli, Nacəba bu işlərin dəfində qeyrət etmli, Xatiri-müğbərrdən rəfi-küdurət etməli, Çarəsazi-sülh olub dəfi-xüsumət etməli, Sabira, beynəlmiləl tədbiri-ülfət etməli! Ey süxəndanan, bu günlər bir hidayət vəqtidir! Ülfətü ünsiyyətə dair xitabət vəqtidir!
Ilk dəfə “Həyat” qəzetində (1 iyul 1905, â„– 19) “M.Ələkbər Sabir” imzası ilə çap olunmuşdur.
|