ÜÇ YÜZ DOQQUZ IDI BƏD HƏZAR
Üç yüz doqquz idi bəd həzar Səneyi-hicrəti-rəsuli-kübar; Mahi-ziqədənin çəharində, O günün nimeyi-nəharində; Bir gün idi ki, xosrovi-xavər Bürci-Dəlv içrə tutmuş idi məqərr. Gərçi qış fəsli idi, leyk həva Rövşənü saf idi fərəh əfza; Nuri-xurşiddən cəhan pürnur, Aləm olmuşdu rəşki-vadiyi-Tur[1]. Qış cəfasın görən könüllər şad, Rənci-sərmadən oldular azad. Xəlq eymən qəmi-bürudətdən, Qəlblərdə fərəh bu halətdən. Hadisati-zəmanədən nagah, Əsdi bir şiddət ilə badi-siyah. Düşdü bir özgə halə bu aləm, Napədid oldu nəyyiri-əzəm; Bəhri-simabtək zəminü zəman Cünbüşə gldi, qopdu bir tufan; Etdi bir növ zəlzələ dili xak, Az qalırdı ki, sipənələr ola çak; Dəkktül-ərz zahir oldu haman, Tarmar oldu xitteyi-Şirvan; Belə fəryad çəkdi kureyi-xak, Sanki torpağa düşdü nöh əflak. Hamı bu halə valehü məftun, Nagəhan hadis oldu bir yanğın; Tutdu dünyanı od şərarələri, Yaxdı dükkanları, imarələri. Nəreyi-tündbad, hiddəti-nar, Lərzişi-ərz, sədmeyi-əhcar. Macəra qəmli macəra üstən, Nazil oldu bəla bəla üstən. Allah, allah, nədir bu tufanlar?! Az qalır rəhmdən çıxa canlar. Oldu guya dəmidə nəfxeyi-sur[2], Macərayi-qiyamət etdi zühur. Əhli-Şirvan hayimü heyran, Əhli-məhşərtək oldu sərgərdan; Qəlblər doldu röbü vəhşətdən, Qayəti-şiddəti-məhabətdən; Olmadı kimsə kimsədən müxbir, Aşikar oldu sirri-yövmi-yəffir; Hər kəs öz nəfsini çəkirdi kənar, Ata övladdən edirdi kənar. Qalmadı bərqərar bir xanə, Cümlə məmur oldu viranə; Ani-vahiddə xitteyi-Şirvan Oldu, səd heyf, xak ilə yeksan. Iki mindən ziyadə əhli-diyar Topraq altında can verib naçar. Yer çü aram tapdı zəlzələdən, Iləlan... o mərhələdən, - Atalar yadinə düşüb övlad, Mehri-fərzənd ilə çəkib fəryad; Atalar fikrinə qalıb fərzənd, Oldu övci-səmaye nalə bülənd. Xırda ətfal iztirab ilə Atasın axtarır şitab ilə; Qarışıb bir-birə səğirü kəbir, Hamı dillərdə kəlmeyi-təkbir; Piri-Kənan kimi hamı giryan, Hərə bir Yusif axtarır heyran[3]; Tapmayıb qəlbi-zarini səmərin, Kimdən alsın cəvaninin xəbərin. Müxtəsər in ki, oldu axiri-ruz, Zülməti-şəb edib zühuru büruz; O gecə bir qəribə aləm idi: Şəbi-yəs idi, leyleyi-qəm idi; Küçələrdə hamı; nə narü nə nur, Qarışıb bir-birə ünasü zükur. Hər tərəfdə quruldu bir matəm, Hər çəməndə əkildi nəxleyi-qəm. Rənci-sərmavü qüsseyi-əmlak, Hər dəqiqə təzəlzül eylr xak. Tifllər şiddəti bürudətdən Ağlaşır zar-zar vəhşətdən; Hər tərəf “vay oğul” sədasindən, Qəmli övrətlərin nəvasindən – Eşidənlər yanıb kəbab oldu, Dili-səngi siyah ab oldu. Əlqərəz, sübhətək hamı giryan, Ta ki, ruzi-cədid oldu əyan, Tazələndi dübarə dərdü ələm, Doldu dünyayə şiveyi-matəm; Kuhkəntək hamı şəkib fəryad, Sanki Şirinin axtarır Fərhad[4] Aldılar cümlə əllərə tişə, Yox könüllərdə özgə əndişə: Atadır, axtarır oğul bədənin, Anadır, seyr edir bəla çəmənin; Bacılar nəşin axtarır qardaş, Eləyir səngü xak içində təlaş; Axtarır hər kəs öz ölənlərini, Çıxarır ruhsiz bədənlərini; Parə-parə o sərvi-zibalər, Əzilib qaməti-dilaralər; Gül kimi cismlər hamı biruh, Əzilib baş, bədən olub məcruh. Mürdələr cismi rəhgüzarlərə Tökülüb güşəvü kənarlərə; Kimi təğsil edir oğul bədənin. Kimi hazır edir ana kəfənin. Nimcan cismlər nə halətdən, Kəsrəti-şiddəti-cərahətdən, Sədmeyi-səngdən batıbdı səsi, Qüdrəti yox və leyk var nəfəsi. Bir neçə nəşlər olub məfqud, Heyf kim, hasil olmayıb məqsud. Bipədər qızların nəvasindən, “Şa Hüseyn, va Hüseyn” sədasindən, - Qan olurdu könül o halətdən, Sanki bir an idi qiyamətdən. Düşdü afaqə naləvü əfqan, Rəhm qıl, ey xudayi-kövnü məkan! Nə təamü nə fərşü nə camə, Xəlqə düşvar olub bu həngamə. Qəhti-nan oldu bədtərin bəla, Allah, allah, nədir bu dərdə dəva?!
|