KİMDƏN NƏ SORUŞDULAR?
Loğman həkimdən soruşdular ki, ədəbi kimdən öyrəndin? Dedi: - Bakının işkol uşaqlarından. Dedilər: - Nə tövr? Dedi: - Təfsilə ehtiyac yoxdur.
* * *
İsgəndər-Zülqərneyndən xəbər aldılar ki, cəsarət və şücaəti kimdən öyrəndin? Dedi: - Nəvvab Eynüddövlə ilə Sərdari-Nüsrət Rəhim xandan. Dedilər: - Nə tövr? Dedi: - Onların yerinə utandığımdan.
* * *
Hatım Taidən birisi soruşdu ki, bu səxavət və kəraməti kimdən öyrəndin? Dedi: - Bakının bəzi milyonçu hacılarından. Dedilər: - Nə tövr? Dedi: - Əhvalat uzundur.
* * *
Firdovsi əleyhirəhmədən soruşdular ki, şer yazmağı kimdən öyrəndin? Dedi: - Müsəlmanların indiki mütəşairlərindən. Dedilər: - Nə tövr? Dedi: - Mən də onlar kimi ləşviyyat yazmadım.
* * *
Bir müsəıman uşağından soruşdular ki, bu qədər söyüşü kimdən öyrəndin? Dedi: - Hamısını dədəmdən. Dedilər: - Nə tövr? Dedi: - O məsə söydükcə, mən də əzbərlədim.
|