MƏKTUB (80)
Ufa, 1 oktyabr (1924).
Əziz oğlum Midhət!
Buradan Qazana yola düşürük. Ümidvarıq ki, oktyabrın 10-nu üçün Bakıda olaq. Bilmirəm anan Bakıya gəlib ya yox. Əgər gəlməyibsə, mənim bu məktubumu ona göndər. Yəqin sən və Ənvər, sözsüz, məktəbə gedirsiniz. Bilmirəm Teymur imtahan tuta bildi ya yox. Əliş (Süleymanın oğlu) necə oldu, məktəbə girə bildi ya yox? Səmədi qəbul elədilərmi? Güzəranınız necə keçir? Hər bir şeyiniz var ya yox? Yəni paltar, dərs kitabları, yemək xərci və i. a. Jurnalın idarəsindən Polina sizə xərclik verməli idi. Əgər Səmədi qəbul eləməyiblərsə, onda Əliş bəyin oğlanlarından birini Bakıya gətirmək yaxşı olardı. Mənim istəkli oğlum Ənvər necədir? Onun hər şeyi varmı? Çatmayan şeyi olsa, Bakıya gələn kimi alaram. Pakizə necədir? Ananın kefi nə təhərdir? (Əgər oradadırsa). Əgər o gəlməyibsə, nə üçün gəlməyib? Axı o gərək müalicə elətdirsin. Ümidvaram ki, siz dərslərinizi vaxtlı-vaxtında, səylə oxuyursunuz. Ev üçün darıxmışam və ona görə də gəlməyə tələsirəm. Siz hələlik öz dərsinizi oxuyun. Hər halda anandan çox nigaranam, xüsusilə ona görə ki, bilmirəm haradadır. Hələlik, xudahafiz. İstəkli balalarımı qucaqlayır və bərk-bərk öpürəm.
Atan Cəlil.
|